သူများနှာခေါင်း အငှားတောင်း MAI လေကြောင်း

အပြည်ပြည်ဆိုင်ရာ မြန်မာလေကြောင်း (MAI)ဟာ လက်ရှိမှာ မလေးရှား၊ ထိုင်း၊ စင်ကာပူ၊ ကွာလာလမ်ပူနဲ့ ဗုဒ္ဓဂယာတို့ကို ပျံသန်းပြေးဆွဲနေတယ်။ မကြာခင်မှာ ရန်ကုန်ကနေ ကမ္ဘောဒီးယား၊ တရုတ်၊ ဘင်္ဂလားဒေ့ရ်ှနတို့ကို တိုးချဲ့ပြေးဆွဲတော့မယ်လို့ ကြွေးကြော်တယ် (Read Here)။ အခုဆိုရင် လေယာဉ် လေးစင်း ရှိနေပြီ။ ငါးစီးမြောက် လေယာဉ် လာတော့မယ် လို့လဲ ဆိုတယ်။ ဒီလို ကြီးပွားလာနေတဲ့ MAI လေကြောင်း အကြောင်းကို တစေ့တစောင်း အကဲခတ် ကြည့်ကြရအောင်ပါ။

MAI မှာ အထက်ပါ လေယာဉ် အမျိုးအစား ဖြစ်တဲ့ Airbus A320-231 သုံးစီး ရှိတယ်။ လေယာဉ်နံပါတ်တွေက XY-AGG, XY-AGI နဲ့ XY-AGL တွေပါ။ ပထမ နှစ်စီးက Adria Airways လေကြောင်းမှာ သုံးပြီးသား လေယာဉ် အဟောင်းတွေ ဖြစ်သလို၊ တတိယမြောက် လေယာဉ်ကလဲ Cyprus Airways မှာ သုံးခဲ့တဲ့ လေယာဉ် အဟောင်း ဖြစ်ပါတယ်။ MAI မှာ နောက်ထပ် သုံးစွဲနေတဲ့ လေယာဉ် အမျိုးအစား နောက်တမျိုး ကတော့ Airbus A321-111 ပါ။ သူက လေယာဉ်အမှတ် F-GYAO ဖြစ်ပြီး Swiss Air နဲ့ Air Méditerranée တို့မှာ အသုံးပြုခဲ့တဲ့ လေယာဉ် အဟောင်း ဖြစ်နေတာကို တွေ့ရပါတယ်။ (Photo: M Radzi Desa)

MAI ဟာ စစချင်းမှာ ဘရူနိုင်း လေကြောင်းနဲ့ မလေးရှားလေကြောင်းက လေယာဉ်တွေနဲ့ သူများ နှာခေါင်း အငှားတောင်းကာ စတင် ပျံသန်းခဲ့ပါတယ်။ အဲဒီတုန်းက လေယာဉ်တွေဟာ သေသပ်လှပတဲ့ ရုပ်ဆင်း အင်္ဂါတွေ ရှိတာ တွေ့ရပါတယ်။ ဒါပေမဲ့ အသေအချာကြည့်ရင် လေယာဉ် အမြီးနဲ့ အင်ဂျင်တွေကိုပဲ MAI အမှတ်တံဆိပ် ဆေးရောင်ခြယ်ထားတာ ဖြစ်ပါတယ်။ ဒီလေယာဉ်ကတော့ MAI မှာ ပထမဦးဆုံး လေယာဉ် အဖြစ် အသုံးပြုခဲ့တဲ့ Royal Brunei Airlines က Boeing 757-2M6 လေယာဉ်ဖြစ်ပါတယ်။ (Photo: Mika B Virolainen)

သိပ်မကြာပါဘူး၊ MAI ဟာ သူ့ရဲ့ လေယာဉ်တွေကို ရုတ်တရက် ကာလာ ပြောင်းလဲလိုက်ပါတယ်။ ဘာကြောင့် အဲသလို လေယာဉ် အရောင် ပြောင်းရပါသလဲ? (Photo: Jialian Gao)

လေ့လာကြည့်တဲ့အခါ လေယာဉ် အရောင်ပြောင်းတာမဟုတ်ဘဲ မူလ လေကြောင်းရဲ့ ကာလာအတိုင်း သုံးစွဲတာ ဖြစ်ကြောင်း အထက်ပါ ဓာတ်ပုံမှာ တွေ့ရပါတယ်။ မွဲတေလှတဲ့ မြန်မာ လေကြောင်းဟာ MAI ဆိုတဲ့ စာလုံး သုံးလုံးနဲ့ အမြီးကိုသာ ဆေးခြယ်ခဲ့တာပါ။ ပြီးတော့ PEGASUS ဆိုတဲ့ စာလုံးကို အပေါ်က အဖြူရောင်ခြယ်ပြီး ဖုံးဖိခဲ့ပါတယ်။ Boeing 737-82R အမျိုးအစားပါ။ (Photo: Reinhart Losch)

ဒီဓာတ်ပုံမှာတော့ သူများနှာခေါင်း အငှားတောင်းပြီး၊ သူတပါး လေကြောင်းလိုင်း အမှတ်သင်္ကေတ နဲ့ အရှက်မရှိ ပျံသန်းနေတဲ့ MAI ကို တွေ့ရမှာ ဖြစ်ပါတယ်။ Boeing 737-82R အမျိုးအစား လေယာဉ် ဖြစ်ပါတယ်။ (Photo: Beiley)

သူများ နှာခေါင်း အငှားတောင်း MAI လေကြောင်းဟာ Fokker 100 လေယာဉ်ရဲ့ Air Bagan အမှတ်အသား ကိုတောင် MAI တံဆိပ်ပြောင်းပြီး ဆေးမသုတ် နိုင်လောက်အောင် မွဲတေသွားပါတယ်။ အဲဒီ လေယာဉ်ဟာလဲ Air Littoral မှာ သုံးခဲ့တဲ့ လေယာဉ် အဟောင်းကြီးပါ။ (Photo: M Radzi Desa)

Orient Thai Airlines တံဆိပ်အတိုင်း ပြေးဆွဲနေတဲ့ MAI ရဲ့ MD 82 (DC-9-82) လေယာဉ် အဟောင်းကြီး ဖြစ်ပါတယ်။ ထိုင်းစာလုံးတွေတောင် ပါလိုက်သေး။ (Photo: Chaity)

Pacific Air လေကြောင်း သင်္ကေတကို ဆေးပြောင်း မသုတ်နိုင်လောက်အောင် မွဲတေတဲ့ MAI ရဲ့ နောက်ထပ် MD 82 လေယာဉ် (Photo: Stéphane Mutzenberg)

MAI လေယာဉ်ရဲ့ အဆိုးရွားဆုံး အခြေအနေ ဖြစ်ပါတယ်။ ဆေးရောင် ကျွတ်နေတာကိုတောင် ကောင်းကောင်း ဆေးမသုတ်နိုင်တော့ပါ။ လူသူ မသုံးတော့တဲ့ MD 82 အမျိုးအစားပါ။ (Photo: Andrew Hunt)

လေယာဉ် အမြီးက တော်တော် ရွဲနေတာ တွေ့ရတယ်။ Continental, Lionair လေကြောင်း တွေမှာ ဖွတ်ဖွတ်ကြေအောင် သုံးခဲ့တဲ့ အဲဒီ လေယာဉ်ဟောင်းကြီးရဲ့ မူလ လေကြောင်း သင်္ကေတ အမှတ်အသား တွေရဲ့ ဘေးမှာ MAI တံဆိပ်ကို ဆေးခြယ်ထားတာ တွေ့ရပါတယ်။ (Photo: Calixius Casper Koh)

ဒါတွေကတော့ သူများနှာခေါင်း အငှားတောင်းပြီးတော့ သူတပါး လေယာဉ် အဟောင်းတွေနဲ့ ပျံသန်း ပြေးဆွဲခဲ့ပြီး၊ ပြေးဆွဲဆဲ.. ပြေးဆွဲ လတ္တံ့သော MAI လေယာဉ်များ အကြောင်းဖြစ်ပါတယ်။ MAI ဟာ ယခုအခါမှာလဲ သူတပါး ဖွတ်ဖွတ်ကြေအောင် သုံးစွဲပြီးဖြစ်တဲ့ လေယာဉ် အဟောင်းများကို ဆေးရောင်လှလှ ခြယ်ကာ၊ လေယာဉ် အသစ်ယောင်ဆောင်ပြီးတော့ ခရီးစဉ်တွေ တိုးချဲ့မယ်လို့ ကြွေးကြော်နေခြင်းသာ ဖြစ်ပါကြောင်း။