မြန်မာပြည် ရထားများပေါ် လက်ပ်တော့ပ် သယ်ဆောင်ပါက ဒဏ်ငွေဆောင်ရမည်

မြန်မာနိုင်ငံက ရထားပေါ်ကို သင်၏ ခရီးဆောင် ကွန်ပြူတာ လက်ပ်တော့ပ်အား ယူသွားပါက လက်မှတ်စစ် တွေ့ရှိလျှင် တန်ဆာမဆောင်ဘဲ သယ်ဆောင်မှုဖြင့် ဒဏ်ငွေဆောင်ရမှာ ဖြစ်သည်။

မြို့ပတ် ရထားပေါ်ဖြစ်စေ၊ နယ်ဝေးပြေးဆွဲနေသည့် ရထားများ အပေါ်တွင်ဖြစ်စေ ကွန်ပြူတာတွေ့လျှင် ဒဏ်ငွေ ၄၈ဝဝ ကျပ်အထိ ဒဏ်တပ်ခံရမည်ဟု နေပြည်တော်ရှိ ရထားပို့ဆောင်ရေး စီးပွားရေးဌာနက တာဝန်ရှိသူတဦးက အတည်ပြုပြောကြားသည်။

”ကွန်ပြူတာ လက်ပ်တောပ့်ကတော့ Personal Use လည်း မရဘူးခင်ဗျ။ တလုံးထဲလည်း ဒဏ်ရိုက်ပါတယ်” ဟု သူက ပြောသည်။

ရထားပေါ် လက်ပ်တော့ ကွန်ပြူတာ သယ်ဆောင်မှုဖြင့် ဒဏ်ရိုက်ခံခဲ့ရသူ တဦးက ဒဏ်ငွေ ကျပ် ၂၁ဝဝ ပေးဆောင် ထားခဲ့ရသော ပြေစာကို မကြာသေးခင်က Facebook တွင် တင်ထားခဲ့ရာ လူအများအကြား မြန်မာ့ရထား၏ စည်းမျဉ်းစည်းကမ်းကို အံ့သြမှု ဖြစ်ခဲ့ကြသည်။

အဆိုပါ ခရီးသည် ဒဏ်ငွေ ဆောင်ခဲ့ရမှုနှင့် ပတ်သက်၍ မီးရထား အရာရှိကမူ ဒဏ်ငွေပမာဏ ၂၁ဝဝ ကျပ်သာ ပေးဆောင်ရသည်မှာ ”ကံကောင်း” သော ဖြစ်ရပ်ဟု ပြောသည်။ ဒဏ်ငွေကို ၃ ဆအထိ ပုံမှန်ပေးဆောင်ရသည်ဟု ဆိုသည်။

ထို့အတူ တလုံးထက်ပိုသော ဓာတ်ပုံကင်မရာ၊ ဗီဒီယို ကင်မရာများလည်း တန်ဆာဆောင်ရန် လိုအပ်သည်ဟု နေပြည်တော် မီးရထား ရုံပိုင်ချုပ်ကြီး ဦးအောင်ခင်က ပြောသည်။

“အဓိကကတော့ ကွန်ပြူတာလိုမျိုး အီလက်ထရောနစ် ပစ္စည်းတွေ ရထားပေါ်မှာ ကိုင်ဆောင်ပြီး သွားမယ်ဆိုရင် ကျနော်တို့ဆီမှာ လာပြီး လက်မှတ်တောင်းယူဖို့ လိုပါတယ်။ တန်ဆာဆောင်ဖို့ လိုပါတယ်။ ဘာလို့လဲ ဆိုတော့ ကျွန်တော်တို့ မြန်မာပြည်က ရထားလမ်းတွေက နိုင်ငံတကာ ရထားလမ်းတွေလို့ အနိမ့်အမြင့် မညီဘူး။ ဒီတော့ ရထားတွေက ဂျုန်းဂျုန်း ဂျက်ဂျက် ဆိုပြီး လမ်းတလျှောက်လုံး ယိမ်းကသလို ခါယမ်း လှုပ်ခတ်တယ်။ ခင်ဗျားတို့ သိတဲ့ အတိုင်း အီလက်ထရောနစ် ပစ္စည်းတွေက အရမ်းနုတယ်လေ။ ထိမိခိုက်မိရင် ပျက်စီးလွယ်တယ်။ ကျွန်တော်တို့ ရထားတွေက အရမ်းလှုပ်တော့ အဲဒီပစ္စည်းတွေ မတော်တဆ ထိခိုက် ပျက်စီးနိုင်ပါတယ်။ ဒါကြောင့်မို့ ကျွန်တော်တို့က စေတနာ ရှေ့ထားပြီး လက်ပ်တော့တွေ မသယ်ဖို့၊ သယ်မယ်ဆိုရင်လဲ တန်ဆာဆောင်ပြီးမှ သယ်ဆောင်ဖို့ စီစဉ်ဆောင်ရွက်ထားတာ ဖြစ်ပါတယ်။ ခရီးသည်များအတွက် တကယ့် စေတနာနဲ့ ဆောင်ရွက်တာ ဖြစ်ပါတယ်” ဟု သူက ဆိုသည်။

အပြည့်အစုံသို့